انتشرت سمعة MADA للانترنت بشكل كبير في الفتره الاخيره لكن تجربتي معاهم كانت وايد فاشله .. ليش ؟؟ شوفوا شصار وياي

في يوم 20 \7 الي اهي ليلة رمضان يعني قبل 20 يوم قلت ابي اجرب مادا و رحت الفرع مالهم  و بديت استفسر من الموظف عن الاسعار و الطريقه و قالي و اكدلي انه في اسوء الحالات السرعه راح توصل 2MBps و شفت التغطية بالمنطقه الي انا فيها عندهم و قالولي تمام طبعا شي حلو و ليلحين وضعنا سليم و سالته اذا ما يازلي يصير ارده قالي اي خلال 3 ايام يطلعلك الفني و يحل المشكله و اذا ما حلها اقدر ارد الجهاز .

هذا كله كلام حلو بس الي صار معاي بعد ما خذيت جهاز راوتر SOHO لان قالي التغطيه مالته احسن رديت البيت احاول اشبك اشوفه حييل بطيء اتصلت على خدمه العملال و قالولي انه في تعديلا على الشبكه و جرب باجر الصبح قلنا ميخالف.. و ثاني يوم جربت لقيته لا كلش ميت اتصلت مره ثانيه و قالي ادش على صفحه SPEED TEST  علشان يشوف السرعه و طبعا من كثر من كان بطيئ حتى الصفحه ما تفتح و قلتله جذي ما راح بنفع معاي و بلغته يقدملي طلب استرجاع و قالي 3 ايام و يطلع الفني يشوف المكان قلنا اوكي و تحولت الثلث ايام الى اسبوعين 14 يوم و طبعا في الفتره هذه كلمتهم اكثر من مره ولا جنه لين اخر شي واحد من ال CONTACT CENTER  قالي روح المركز الرئيسي رده

والله سكتنا و رحنه و هذا الحجي كان يوم الاحد الي طاف تاريخ  5\8  طبعا ليلحين MADA ما شبعوا من انهم يرفعوا ضغطي قالولي خلاص راح اندزلك المبلغ بشيك خلال 3 ايام و راح يكلمك السايق قبل ما يوصل يشوف وينك و طبعا احنه عرفنا انه ال 3 ايام  مالت MADA عن اسبوعين … طافت 5 ايام لين امس يالي السايق من غير لا يدق ولا يبلغ انه ياي و انا كنت طالع من التراويح وبروح  بشرب قهوه و دقوا علي البيت يقولون انه السايق وصل و مشي و اتصلت على MADA للمره ال1000 و قلتلهم السالفه بس رد علي واحد شقني و اهو يقاطعني و يوم قلتله حولني على المسؤول عطاني القاضيه .. ” اخوي مافي مسؤوول الحين ” هذا و انا داق الساعه 10 بليل و بديت اسأل اذا صارلكم ضرف منو يحله قال اندز ايميل قلتله تمام دز ايميل خل المسؤوول يكلمني رد و قال ” اخوي مافي مسؤول الحين ” و علشان تختم هذه التدوينه خلونه نراجع الاشياء الصح و الاشياء الغلط الي صارت

الاشياء الصح

الحق ينقال في اثنين موظفين محترمين – موظفه الاستقبال بالفرع الرئيسي لمه رحت ارد الجهاز – و الي اتصل علي من خدمه العملاء عقب ما سويتلهم لويه كان وايد محترم

الاشياء الغلط

1- قدمت طلب فني ولا احد كلمني لمده 14 يوم و اهو الاجراء انه خلال 3 ايام

2- رحت فرعهم الرئيسي و قالولي الشيك خلال 72 ساعه طافت خمس ايام من غير حس ولا خبر

3- السايق وصل و مشي من غير لا يكلمني ولا ينسق معاي و الحين ما ادري متى بيشرف مره ثانيه

4- اسلوب موظف خدمه العملال وايد يحر و يرفع الضغط

5- العمليه كلها على بعضها كانت المفروض تاخذ 6 ايام علشان ارد الجهاز ( 3 ايام للدعم الفني ) ( و 3 ايام علشان يوصلون الشيك ) ولكن صارلها الحين 20 يوم

بصراحة !!  بدعتي يا MADA

 And with these words i end this Chapter.